AEKren irakaskuntza plana marrazten saio parte-hartzailean elkartu dira hainbat AEKide gaur (martxoak 7), Gipuzkoako Ganberan, Donostian.

Bertan erakundearen egoera pedagogikoaren azterketaren gaineko hausnarketak eta iritziak trukatu dituzte didaktikariek eta irakasleek.

Eskerrik asko parte hartu duzuen kide guztioi!

Erasoa.
Kolpea.
Beste eraso bat.
Beste kolpe bat.
Jaso eta jaso.
Eta beldurra sentitu.
Eta hori da batzuek nahi dutena.

Bada, ez diegu utziko.

Okerrera goaz,
nazien keinuak modan jarri dira.
Hobe dira pentsatzen ez dutenak,
ezer ezbaian jartzen ez dutenak;
horrela, erreproduzitu egingo dituzte modak.
'Gustu txarreko txistea' esatea, ordea, eufemismoa da dagoeneko,
FAXISMOAZ ARI GARA hizketan.

Ireki begiak eta ernatu.

Erasoak eta kolpeak denontzat dira, ez emakumeontzat soilik. Ikusezin
bihurtu, desitxuratu, deuseztatu nahi gaituzte.

Alabaina, feminismoak indartsu dirau, emakume borrokalariok hemen gabiltza,
lehen, bigarren eta azken ilaretan dantzan. Eta ez gaude bakarrik, zapalduak aliatu ditugu. Horrexek sortzen du beldurra beste aldean, eta epaiak eta
erasoak. Horrexegatik da dena gordinagoa, baina marka guayak erabiliz saldu
nahi digute ustezko berdintasuna.

Aliatu.

Ze hau (ere) gerra da:

Emakumeok* etengabe pairatu izan dugu biolentzia, eta ezkutatu egin nahi
izan da; etengabe borrokatu gara, lan egin dugu eta egiten jarraitzen dugu.
Dena isildu nahi izan digute.

Aurre egin eta aurrera ekin!

Orain, aldiz, ez gara isiltzen, eta molestatu egiten du. Martxoaren 8ak hori
ikusarazteko balio du, bai, munduak emakumeok* ikus gaitzan. Kontua da
denok gaudela mundu honetan; beraz, zeuk erabaki: eraiki ala suntsitu.

Sinpleki: faxismoaren kontra, ausardia eta aliantza feministak!

Plazara, AEK, Uda Leku, Dindaia eta Ebete erakundeetako kideek Famili’on egonaldi ibiltariaren lehen edizioa ezagutzera eman dute. Udaberriko oporretan familian momentu goxoak pasatzeko eta helduek euskara ikasten jarraitzeko aukera ezinhobea!

Goizean, helduak euskara klaseetan izanen diren bitartean, haurrak jokoetan ibiliko dira. Arratsaldean, gurasoek eta haurrek batera ekintzak eging dituzte, eta batzuetan, publiko zabalari irekitako animazioetan parte hartuko dute. Helburu nagusia parte-hartzaileen euskara maila hobetzea da eta familien hizkuntza ohiturak aldatzea, baina baita Euskal Herriko xoko ezberdinak ezagutzea ere.

Bi formula ezberdin, euskara eroso bizitzeko

-Apirilaren 21etik 25era. Aste bat barnetegian, 5 egun eta 4 gau Baigorri (Baxe Nafarroa) eta Lesaka (Nafarroa) artean, maila aitzinatua duten gurasoentzat (B1-B2),

-Apirilaren 28tik maiatzaren 3ra. Aste bat ikastaldian, 5 egun eta gau bat pasatuz Arbona (Lapurdi) eta Orio (Gipuzkoa) artean, oinarrizko maila duten gurasoentzat (A2).

Talde txikiak izango dira: aste bakoitzean 20 familia* elkartuko dira, 3 eta 11 urte bitarteko haurrekin. Aste bakoitzaren prezioa 300€ eta 650€ artekoa da, formularen eta seme-alaba kopuruaren arabera. Prezio horretan sartzen dira: apairuak, garraioa, lo tokia, aktibitateak, klaseak, animazioak eta materiala.

*Aurten Ipar Euskal Herriko udaberriko oporrek bat egiten dute Hego Euskal Herriko Aste Santuko oporren bukaerarekin, Arabako San Prudentzio bestarekin eta maiatzaren 1eko zubiarekin, beraz, edizio honetan Euskal Herri osoko familiek parte hartuko dute.

Izen-emateak eta informazioa
Martxoaren 15ean bukatuko da izena emateko epea, HEMEN. Informazio gehiago: telefonoz (+ 33 06.03.20.50.10) edo e-postaz (Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.) edo hemen.
Deskargatu eskuorria.

Famili'On egonaldiaren aurkezpena Baionan, otsailaren 21ean, ama-hizkuntzaren nazioarteko egunaren karietara, egin zen. Plazara, AEK, Uda Leku, Dindaia eta Ebete erakundeetako kideekin batera, babesle diren instituzioetako ordezkariak ere bertan izan ziren: Mathieu Berge (Euroeskualdea), Joseba Erremundeguy (Euskal Hirigune Elkargoa), Javi Arakama (Nafarroako Gobernua) eta Johañe Etxebeste (Euskal Kultur Erakundea).

Izen handiz beteriko kartelarekin ospatuko da apirilaren 5ean ZEIDFEST Gaztea jaialdia BEC!eko Bizkaia Arenan. AEKk egingo du ohorezko ate-irekiera. Gaur jaialdiaren aurkezpen-prentsaurrekoa egin da Bilboko EITBren egoitzan. AEKren izenean, Aize Otaño Lizarralde eta Lurdes Etxezarreta Artabe Nazio Kontseiluko kideak izan dira bertan.

Euskal proposamen ugariz gozatzeko aukera izango da, eta kanpoko artista entzutetsuak ere bertaratuko dira: Zea Mays, Süne, Betagarri, Dupla, Joselu Anaiak, Ingot, Kai Nakai, Isabel Aaiún, Crystal Fighters, Akerbeltz, besteak beste. Bestelako ekimenak ere izango dira musikaz gain, hala nola, Ana Goitiaren bakarrizketa eta Eleder Magoaren emanaldia.

Jaizkibel konpainiaren eta Naizen Elkartearen lekukoa hartuta, aurten AEKk izango du ate-irekiera egiteko ohorea, goizeko 11:00etan. Ordu bete geroago kontzertuak hasiko dira.

Festibalean euskal sortzaileak, euskal musikariak... dira protagonista; eta, jakina, euskara da hizkuntza nagusia. AEKren xedea Euskal Herriko biztanle guztiak euskaraz eroso bizitzea da, eta hori dela-eta euskararen ezagutzan, erabileran eta sustapenean aritzen da Euskal Herri osoan.  "AEKk euskal herritarrek euskara eroso erabiltzeko baldintzak izatea nahi du, eta eginkizun horretan dihardu, buru-belarri, egunero, lanean gure euskaltegietan, gure berbalagun eta mintzalagun egitasmoetan, eta abar. Azken finean, gure ikasleak euskaltegietatik ateratzean gure hizkuntza arlo guztietan erabiltzeko aukera izan dezaten bilatzen dugu: lagunartean, familian, lanean, aisialdian...", adierazi du Otañok, eta ZeidFest Gaztea jaialdiak horretarako aukera ematen du: euskal musikaz gozatzeko, giro onean, eroso, aske eta, jakina, euskaraz aritzeko gune horietako bat da, dudarik gabe, eta, beraz, "gure irakasle, ikasle, berbalagun eta AEKide guztiei euskaraz eroso bizitzeko gune hori aprobetxatzera dei egiten diegu". 

ZeidFest jaialdia BECen izango denez, bereziki aipatu nahi ditugu Barakaldon, Ezkerraldean, eta Euskal Herriko gunerik erdaldunenetan euskara ikasten ari diren ikasleak; euskaraz eroso bizitzeko guneak sortzea hain erraza ez den lekuetan horiek sortzen ari direnak.  Ezkerraldean -Barakaldo, Sestao, Portugalete eta Santurtzin- 1000 ikasle baino gehiago dabiltza euskara ikasten, eta 400 Berbalagun baino gehiago ari dira euskara praktikatzen kalean. "Sarri egiten dugu berba euskararen arnasguneei buruz; bada, zorionez, hauen guztien ahaleginari esker, gero eta ohikoagoa da Bilbon, Ezkerraldean, Arabar Errioxan, Erriberan edo Enkarterrin... arnasguneak topatzea, alegia, euskaraz eroso bizitzeko guneez gozatzea", gaineratu du Etxezarretak.  

Sarrerak, salgai

Sarrerak Zeidfest Gaztea jaialdiaren webgunean eskuratu daitezke.

Eskerrik asko, ZeidFest Gaztea.

Apirilaren 5ean ikusiko dugu elkar!