Ira
AEKk euskaltegiak bete nahi ditu 26/27 ikasturtean
AEKren euskaltegietan matrikula-epea, zabalik
Berrikuntza nabarmenak izango dira dirulaguntzei dagokionez
50 urte baino gehiago Euskal Herria euskalduntzen
AEKk Euskara eroso ikasi eta bizi/Aprende y vive el euskera cómodamente/Apprenez et vivez le basque avec plaisir kanpaina aurkeztu du gaur Donostiako Ernest Lluch kultur etxean. Horrela eman dio hasiera 26/27 ikasturteko matrikulazio epealdiari, dagoeneko zabalik baititu euskaltegietako ateak Euskal Herri osoan.
AEKko Nazio Kontseiluko kide Aize Otaño Lizarraldek, Maialen Otegi Saez de Egilaz Irakaskuntza arduradunak, eta Amara Berri AEK euskaltegiko Maialen R. Barcena irakasleak eta Iñaki Carcavilla Garasa ikasleak osatu dute aurkezpena. Hasteko, Aize Otañok azaldu du, kanpainako iazko leloari eutsi arren, irudia aldatu egin dela ikasturte honetan: “Besaulkia alfonbra batez ordeztu dugu. Alfonbra gonbidapena da, euskara ikasteko ustezko zailtasunen beldur den horrentzat. Era berean, ikasgelako erosotasuna kalera eramateko gonbita ere bada. Alfonbrak ez dira, beharbada, besaulkiak bezain erosoak, baina eramangarriagoak dira, eta lurrarekin hobeto konektatzen gaituzte. Eta kanpaina, alfonbrak bezala, Euskal Herriko plaza eta kaleetara atera nahi dugu; euskara bera Euskal Herriko karriketara eta enparantzetara atera gura dugu. Baina hori horrela izan dadin, euskaltegiak bete behar ditugu lehenik eta behin, ez dakienak ikasteko, dakienak hobetzeko, praktikatzeko...”.
Horren harira, Otañok ekainaren 13ko Euskaltzaleon Martxa ekarri du gogora: “Orduan adierazi genuen euskara eta euskal hiztun-komunitatea larrialdi linguistikoan daudela, eta ezinbestekoa dela biziberritze-prozesuan jauzia egitea, pizkunde berri bat eragitea. Pizkunderako Erronka da 300.000 euskaldun gehiago izatea 2036. urterako; alegia, 10 urteko epean urtez urte 30.000 euskaldun oso irabaztea. Horretarako gakoetako bat, estrategikoa, helduen euskalduntze-alfabetatzea da. Hamarkada bakar batean 120.000 euskaldun oso sortzea da helburua. Horixe dugu erronka, horixe dugu helburu, eta horixe da euskaltegion egitekoa”.
Xedea lortzeko ezinbestekoak izango diren hainbat kontu aletu ditu Otañok: “Euskara-ikasketen doakotasuna eta irisgarritasuna, HEAren inguruan agentzia berri bat sortzea erakunde eta gizarte-eragileen jarduna koordinatzeko, pertsona migratuen harrera linguistikorako baliabide eta erraztasunak handitzea, eta, azkenik, lan-munduan euskararen presentzia areagotzeko araudi, baliabide eta plangintzak sustatzea. Zentzu horretan, txalotu egiten ditugu azkenaldian Hego Euskal Herriko administrazioek doakotasunaren bidean egin dituzten urratsak; bereziki EAEn ezarri den Euskara Bonua. Hori guztia, gure ustez, ez da nahikoa, baina horixe da bidea”.
Esandako guztia ederki laburbiltzen duelakoan, Otañok 24. Korrikaren amaieran Bilbon euskal jendarteari luzatutako mezuaren pasarte bat gogoratuz bukatu du bere diskurtsoa: “Euskaltzale eta euskaldun guztioi, y también a las personas que todavía no habéis dado el paso de aprender euskera, aux personnes qui n'ont pas encore fait le pas d'apprendre le basque: euskaltegietako ateak zabalik dituzue, tenéis las puertas de los euskaltegis abiertas, les portes des Euskaltegis sont ouvertes. Zeren eta hizkuntzarik ez duen herri bat ez da herri izango, un pueblo que no tiene lengua no será pueblo, un peuple qui n'a pas de langue ne sera pas un peuple. Eta GU EUSKARA GARA!”.
Ondoren, Maialen Otegi Saez de Egilaz Irakaskuntza-arduradunak azaldu du gaurtik aurrera matrikulazioa zabalik dagoela AEKren euskaltegietan, “bertan herritarrek euskara eroso ikas dezaten eta euskaraz eroso bizi daitezen, horixe baita AEKren xedea. Euskaltegiak euskara ikasteko gune erosoak izatea nahi dugu, eta ikasleek handik ateratzean arlo guztietako baliabideak izatea gura dugu: lagunartean, familian, lanean, aisialdian... Milaka herritar hurbildu dira azken ikasturteotan AEKren euskaltegietara euskara ikastera, beren maila hobetzera edo praktikatzera, etxeko eta lagunarteko harremanak euskaraz izateko, lan-egoera hobetzeko eta abarrerako. Ikasturte honetan ere zinez espero dugu herritar gehiago hurbiltzea AEKren euskaltegietara. Erronka-zaleak gara AEKn, eta hamarkada batean 120.000 euskaldun oso gehiago sortzea dugu erronka. Horri begira, AEKk 100 euskaltegi baino gehiago ditu Euskal Herri osoan, eta horien bidez beste hamaika herritara iristen da”.
Eskaintza ikasleen beharrizanetara egokituta, enpresa, udal, elkarte, ikastetxe eta abarretan ematen ditu AEKk, hainbat formatutan: “Hilabeteko ikastaro trinkoak, urte osoan, Foruko barnetegian. Pantailen beste aldetik ere, nahi duen orok euskara eroso ikasteko aukera du, esaterako AEKren online euskaltegiko ikastaroen bitartez. Erabilerarako aukerak ere bai: AIZU! aldizkaria, euskaraz irakurtzeko; Praktikaturen eskaintza, mintzapraktika giro atseginean egiteko; Ahize aholkularitzaren laguntza, lan-esparruan euskara normalizatzeko...”.
Dirulaguntzei dagokienez, Euskara Bonua da 2026-2027 ikasturterako berrikuntzarik nabarmenena EAEn: A1, A2 eta B1 mailetan matrikulatzen diren ikasleek, 120 euro ordainduta, 4 urtez ikasi ahal izango dute, ezer gehiagorik ordaindu gabe. Nafarroan ere urrats bat aurrera egin da doakotasunean: A1 mailako ikasleez gain, A2 mailako ikasleek ere % 100 berreskuratzen ahalko dute matrikula. Ipar Euskal Herrian, formaziorako aukera eskaintzen dute enpresek, eta langileek doan dituzte euskara-ikastaroak.
Maialen R. Barcenak, bere aldetik, AEKren metodologia komunikazioan oinarritzen dela azaldu du, praktikotasunean, “euskara lehenengo egunetik erabiltzeko ikastean: ez da gramatika-ikasketa hutsa, beste euskaldun batzuekin komunikatzeko gai izatea baizik”. Hain zuzen ere, holaxe ari da ikasten Iñaki Carcavilla Garasa, Donostiako musika-eskolako irakaslea bera. Ayerbe herrian (Huesca) jaioa, bere esperientziaren berri eman du aurkezpenean. Musikenen ikastera etorri zen Donostiara, eta joan den ikasturtean A1 maila ikasi eta gainditu zuen Amara Berri AEK euskaltegian. Ikasten jarraitzeko asmoa duela adierazi du; izan ere, Donostiako euskal komunitatean oso integratuta egonik, euskararen premia sentitzen du. Bizitzen ari den esperientzian oinarrituta, euskara ikastera animatu du mundu guztia.
Bukatzeko, Aize Otañok hartu du berriro hitza, ikasturte berriko irudian ageri den logotipo berriari erreparatuta: “50 urte baino gehiago Euskal Herria euskalduntzen”. AEK lehenago sortu zela adierazi du, baina duela 50 urteko ikasturtea oso une esanguratsua izan zela: “1976-77 ikasturtean ikasle-kopurua % 300 handitu zen, eta ikasle-uholde horrek beste dimentsio bat eman zion helduen alfabetatze-euskalduntzeari: indar handiagoa hartu zuen gizarte-fenomeno moduan ere. Testuinguru horretan hasi zen AEK, AEK izenez, Euskal Herri osoan erakundetzen. Prozesu hori geroago amaitu bazen ere, 76-77 ikasturtea mugarri garrantzitsua izan zen. Hori kontuan hartuta, urteurren hori gogorarazi nahi izan dugu kartelen eta bestelako euskarrien bidez. Erran gabe doa hau hasiera baino ez dela.
Gaur egun ere, euskarak halako mugarriak behar ditu pizkunde berri baterako bidean. Izan dadila ikasturte hau euskararen geroa bermatzeko mugarri. Bete ditzagun euskaltegiak”.
Eka
26-27 ikasturterako aurrematrikula zabalik ekainaren 30era arte
26/27 ikasturterako matrikula epea irekita dago AEKko euskaltegietan eta, izena ekainaren 30a baino lehen emanez gero, hainbat abantailaz gozatu ahal izango du ikasleak: ikasturte honetako prezioan ordainduko du, irailean ezarriko den igoera ekidinda, eta ordaintzeko modu malguagoa eskainiko zaio, ordainketa epe gehiagotan egin ahal izateko. Gainera, lehentasuna izango du taldeak eratzeko orduan. Apirilaren 20an zabaldu zen aurrematrikula epea eta martxa onean doa, jendeak datorren ikasturtean euskara ikasteko asmoa duen seinale.
Aurrematrikula HEMEN.
Bestalde, AEKk zuzeneko web bidezko bi aurkezpen eskainiko ditu ekainaren 16an, aipatutako 26/27 ikasturteari begira. Goizeko 10:00etan eta arratsaldeko 15:30ean izango dira, Maialen Otegi Saez de Egilazen (irakaskuntza arduraduna), Maialen R. Bárcenaren (irakaslea) eta Maialen Begiristain Gradoren (Nazio Kontseiluko kidea) eskutik. Helburua izango da euskararen irakaskuntzarako AEKk duen metodologia eta ikastaro motak azaltzea, baita ere euskara ikasleentzako dirulaguntzen berri ematea (aurtengo nobedadeak barne: Euskara Bonua EAEn, A1 eta A2 mailak dohainik Nafarroan...). Bertan parte hartzeko, ez dago izena eman beharrik, nahikoa da ordu horietako batean webgune honetan sartzea.
Eka
Zabalik 2026-2027 ikasturteko aurrematrikula
Datorren ikasturtean, 2026/2027 ikasturtean, euskara ikasten jarraitu edo euskara ikasten hasi nahi duen orok (AEKko ikasleek zein ikasle ez direnek) baliatu dezakete AEKren matrikulazio eskaintza berezia.
Webgune HONETAN nahiz AEKren edozein euskaltegietan egin daiteke.
Aurrematrikula ekainaren 30a baino lehen egiten dutenek honako onura hauek izango dituzte:
- Ikasturte honetako (2025/26) prezioari eutsiko zaio
- Ordainketa malguagoa, epe bat gehituta ohiko ordainketa epeei
- Lehentasuna taldeak eratzeko orduan
Izen-emateak eta informazioa: AEKren edozein euskaltegitan // 673 200 100 · 946 464 000 // Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.
Aurrematrikularen prezioa (lehenengo ordainketa): 100 euro (HABE edo Euskarabidearen aparteko dirulaguntza duten ikastaroen kasuan izan ezik).
Oharra: Ikastaroa ez egitea erabakiz gero, aurrematrikularen %100 itzuliko da ikastaroa hasi baino lehen jakinaraziz gero. Behin ikastaroa hasita, matrikula itzultzeko ohiko baldintzak aplikatuko dira.
Oharra: ezin da aurrematrikularik egin online-ikastaroetan. Dena den, datorren ikasturteko online-ikastaroetan izena emateko asmoa duenak GALDETEGI HAU bete dezake.
Mai
EUSKARAZ KOOP. S.ren Ohiko Batzar Orokorrerako deialdia
Euskaraz Koop. S.ren Estatutu Sozialetako 31. eta 32. artikuluetan xedatutakoari jarraituz, Artezkaritza Kontseiluak Euskaraz Koop. S.ren Ohiko Batzar Orokorrerako deialdia egin du.
DEIALDIA
Eguna 2026ko ekainaren 26a
Tokia: AGURAINgo HARRESI aretoan
Ordua: Lehen deialdia 9:30ean.
Bigarren deialdia: 10:00etan
GAI ZERRENDA
Lehena.- Akta onartzeko bi bazkide eta batzarreko idazkaria izendatzea.
Bigarrena.- Euskalgintzaren Kontseilua. (Lan ildoen aurkezpena)
Hirugarrena.- Kudeaketarekin lotutako zenbait proposamen (25-26 aurrebalantzea eta 26-27 aurrekontuaren aurreikuspena, 26-27 eta 27-28 ikasturteetarako z.o.-ak, egin beharreko ekarpenaren zenbatekoa, Korrika, ...)
Laugarrena.- Kontu ikuskaritza aukeratzea.
Bosgarrena.- Jazarpenen aurkako protokoloa eta Barne-araubideko erreglamenduaren egokitzapena.
Seigarrena.- Sozietate organoak: Artezkaritza Kontseiluaren berritze partziala.
Zazpigarrena.- Ahalmena ematea Artezkaritza Kontseiluko lehendakariari eta idazkariari Batzar Nagusian hartu diren inskribatu beharreko erabakiak notarioaren aurrean eskritura publikoan jasotzeko, hala badagokio, eta Euskadiko Kooperatiben Erregistroan inskribatuak izan daitezen egin beharreko izapideak burutzeko.
Zortzigarrena.- Galde-eskeak.
OHARRA: Bazkideei jakinarazten zaie, Euskadiko kooperatiben legearen 24.4 eta 78.1c artikuluetan zedarritutakoarekin bat etorriz, bazkide guztiek dutela eskura kooperatibaren egoitza sozialean eta barne sarean kooperatibaren dokumentazio ekonomikoa eta Barne-araubideko erreglamenduaren berrikusketa proposamena, batzarrean landuko den gainerako dokumentazioarekin batera.
Lehendakaria
Lurdes Etxezarreta Artabe
Bilbon, 2026ko maiatzaren 22an
Mai
AEK izango da MootEU 2027 jardunaldiaren antolatzailea
AEKk antolatuko du 2027ko MootEU jardunaldia, euskarazko hezkuntza digitalaren eta Moodle plataformaren inguruko erreferentziazko topaketa. 2026ko edizioaren ondoren, datorren urteko jardunaldiak euskal hezkuntza-komunitateko profesionalak, teknologia-adituak eta irakasleak bilduko ditu berriro, hezkuntza digitalaren etorkizunaz hausnartzeko eta esperientziak partekatzeko.
MootEU urtez urte sendotzen ari den hitzordua da, Moodle plataformaren erabiltzaile, kudeatzaile eta garatzaileentzako topagune bihurtuta. Jardunaldiaren helburua da berrikuntza pedagogikoa, tresna digitalen erabilera eta euskararen presentzia ingurune digitalean sustatzea. Azken urteotan adimen artifizialak, ikaskuntza kolaboratiboak eta software librearen aukerek protagonismo berezia hartu dute jardunaldian.
Edizio honetan Tknikak antolatu du jardunaldia, maiatzaren 22an, Errenterian eta saioaren bukaeran lekukoa pasatu dio AEKri. Erakundearentzat MootEU 2027 antolatzea aukera paregabea izango da euskararen irakaskuntza eta teknologiaren arteko lotura indartzeko, eta hezkuntza-komunitateari berrikuntza digitalaren bidean laguntzeko. Aurrerago egitaraua eta informazio guztia argitaratuko dute MootEUren webgunean.
Argazkian, Tknikako Aitor Orbegozo (eskuinean) eta AEKren e-uskaltegiko Andoni Tolosarekin.
Mai
AEKn euskara irakasle izan nahi?
Euskara irakasle izateko ikastaroa AEKn irakasle lanerako trebatzeko prestakuntza da. Helburua da helduen euskalduntzerako euskara-irakasle berriak prestatzea, lehen egunetik irakaskuntza autonomoa eta eraginkorra garatu dezaten, ikuspegi komunikatiboan eta hizkuntza gutxituen biziberritzean oinarrituta. Hurrengo ikastaroa irailaren 2tik 29ra izango da.
Ikastaroa egin ostean, gure lan-poltsan eman ahalko duzu izena. Horretarako, gradu-ikasketak eta C1eko agiria izan beharko dituzu.
- Iraupena: 40 ordu plataforman (online) + 16 aurrez aurre (4 goiz) + tutoretza bana
- Aurrez aurrekoak: irailaren 4, 11, 18 eta 25ean
Ordutegia: 9:30-13:30
Prezioa: 455 euro
IKASTAROA BETETA DAGO!
Matrikulazio epea: uztailaren 10era, edo lekua bete arte.
Mai
Gaur abiatu da AEKn udako kanpaina
Dagoeneko eman daiteke izena AEKn udan euskara ikasteko. Kanpaina, Uda bizi, euskara eroso ikasten lemapean, uda osora zabalduko da, euskara ikasteko hainbat aukera eskainiz: barnetegia, euskaltegia, Euskal Herria bizikletaz zeharkatuz edo online; mintzataldeetan praktikatzeko parada ere izango da zenbait herritan. Izan ere, leloak berak dioen moduan, uda bizitzeko garaia dator, ahalik eta erosoena bizitzeko aroa, non alde batera geratzen diren ikasturteko betebeharrak eta opor-giroa nagusitzen den. Haatik, aisialdia ustiatzeko asmoa ere sortzen da batzuetan, “zerbait egiteko aprobetxatu” nahia.
Horretarako aukera zabala du AEKk udan: euskara ikasteko hainbat modu eroso jartzen ditu edonoren esku, ikasprozesua arina eta atsegina izan dadin. Argi adierazten dute hori kanpainako bi protagonistek; Victoria Zarco eta Oihane Alonso (bi seme-alabarekin) ez dira modelo hutsak, baizik eta AEKren barnetegietan udan euskara ikastea zer den ondotxo dakiten euskara-ikasleak.
Edozein barnetegi mota da aukera ederra euskararen ikasprozesuan aurrera egiteko, hainbat arrazoirengatik: ikaslea euskaraz bizi den ingurune batean murgiltzen da; eguneroko bizimodua euskaraz egiten du, goizetik gauera; ikasitakoa praktikan jartzen du etengabe; bere burua euskaraz egiteko gai ikusten du; euskaraz aritzeko ohitura sendotzen du; euskaraz berba eginez, harreman berriak egiten ditu... Gainera, mota askotako barnetegiak daude: familia-barnetegiak, euskalduntzekoak, azterketak prestatzekoak, xiberera ikastekoa, ibiltaria bizikletaz...
Bestalde, maiatzaren 12an zuzeneko web bidezko bi aurkezpen egingo ditu AEKko Udako Barnetegietako arduradun Alba Ayucar Castrok, familia-barnetegien inguruan, goizeko 10:00etan eta arratsaldeko 15:30ean. Ez dago izena eman beharrik, nahikoa da ordu horietako batean www.aek.eus atarian sartzea.
Barnetegiez gain, zenbait euskaltegiren ateak ere irekita egongo dira udan: barnetegira joaterik ez edo etxetik gertu egon nahi duten ikasleentzat, ikastaro trinkoak eskainiko ditu AEKk. Halaber, online ikastaroetan ere eman daiteke izena. Hala, datozen hilabeteetan, AEKk erakutsiko du uda eta euskara eroso ikastea bateragarriak direla.
Informazio guztia: https://www.aek.eus/eu/uda
Api
Sopelako Esaera Zaharren Txapelketa, apirilaren 25ean
Atsotitzak, bertsoak, musika eta giro paregabea lotzen dituen lehiaketa honen 31. edizioa apirilaren 25ean ospatuko da aurten. Urtero lez, edizio honek ere badu bere leloa: Igazko kabiak hutsik, ez da aurten txoririk. Bertsolari gonbidatuak, berriz, Aner Peritz eta Aissa Intxausti izango dira. Ikasi beharreko ehun errefrauak prest daude dagoeneko https://praktikatu.eus/esaerazaharrak atarian, eta parte hartu nahi duten taldeek (bi eta lau lagun artekoak) apirilaren 20ra bitartean eman ahalko dute izena, webgune horretan bertan edo HEMEN.
Liburuaren aurkezpena hilaren 17an
Lehenago, ordea, apirilaren 17an, lehiaketaren inguruko beste ekitaldi bat egongo da: Sopelako Esaera Zaharren Txapelketa: edo nola (ez) antolatu herri-ekintzak liburuaren aurkezpena Kurtzio kultur etxean. Izan ere, AEKk argitaratuko du, Uribe Kostako Mankomunitatearen dirulaguntzaz, lehiaketaren antolatzaile-taldeko kide Aitor Fernandez de Martikorenak idatzitako liburua. Lehiaketaren zertzeladak ditu oinarri, hiru atal nagusitan banatuta: testua, argazkiak eta material didaktikoa. Lehenengoa kontakizuna da, irakurleak jakin dezan nolako lana egin duten antolatzaileek lehiaketa aurrera eramateko. Bigarrenean, kartelen, oroigarrien, pegatinen, lehiakideen, bertsolarien... irudiak daude. Eta hirugarrenak lagungarri izan gura du euskara-irakasleentzat, atsotitzak eta/edo bertsoak lantzeko material egokia baita. Azken atal horretan, txapelketa hasi zenetik igarotako hiru hamarkadetan noizbait agertutako 206 atsotitz biltzen dira, azalpenez eta bertsoz horniturik.
Liburuaren egileak hitzaurrean azaldu duenez, asmoa ez da izan Esaera Zaharren Txapelketaren “kronika zehatza” egitea: “Nahikoa lan izan dugu edizioak egiten eta lehiaketa aurrera eramaten; hortaz, gutxitan apuntatu izan ditugu emaitzak eta sariak”. AEKk, ordea, omenalditxoa egin nahi izan dio liburua argitaratuz, ekimenak urtero-urtero, eta euskararen izenean, jende-kopuru polita batzen duelako. Zelan ez, txapelketak 30 edizio bete izanak ere badu zerikusia horretan. Uribe Kostako Mankomunitateak, bestalde, diruz lagundu du argitalpena, lehiaketak herrian euskararen presentzia indartzeko egiten duen ekarpenarengatik.
Api
12. eguna: doako euskara eskolak eta mintzodromoak
Euskara gara eta izango gara! Doako eskola apirilaren 22an AEKren euskaltegietan eta maiatzaren 21ean, ordea, mintzodromoak 65 herritan
AEKk 12. eguna: eta izango gara! izeneko ekimena iragarri zuen euskararen aldeko lasterketararen balorazioan.“Korrikan parte hartu duten eragile guztiei konpromisoa eskatzen diegu, ekiteko engaiamendua. Lan horretan, besteak beste, ezinbestekoa da ordezkari politikoen ardura, haien babes juridiko eta politikoa. Askok eraman dute lekukoa Korrikan, baina ekintza sinboliko horretatik haragoko konpromisoa eskatzen diegu hemendik: Korrikaren harira egindako adierazpen ederrak ekimen bihur ditzatela, benetan susta dezaten Euskal Herri euskalduna”.
Eskaerak egiteaz batera, AEKk berak zer gehiago egin dezakeen adierazi zuen erakundeak agerraldian: “Beti esan dugu ez dela nahikoa Korrikan parte hartzea, hurrengo eguna ere garrantzitsua dela: benetako lanketa, konpromisoa, behin Korrika igarota dator. Asmo handiko helburuekin abiatzen dugu lasterketa, baina ekimena bera labur geratzen zaigu askotan, eta Korrikak 11 egun horietatik harago joan behar dugu. Hori dela-eta sortu dugu Korrikaren 12. eguna: Euskara gara eta izango gara! izeneko ekimena.
Horren baitan, apirilaren 22an ordubeteko eskola emango dugu, doan, gure 100 euskaltegietan. Hasiera-mailako klaseak izango dira, oraindik euskarara hurbildu ez direnentzat. Bestalde, maiatzaren 21ean inoiz baino euskara gehiago entzungo da gure artean! 65 mintzodromo antolatuko ditugu egun horretarako, Euskal Herriaren luze-zabalean. Azken batean, horrela lortuko dugu helburua: ikasiz eta praktikatuz.
Informazioa guztia: www.korrika.eus/etaizangogara eta AEKren euskaltegietan
Izen-emateak: www.korrika.eus/12eguna eta AEKren euskaltegietan