Zeidfest Gaztea festibalaren eta bertara joango direnen omenaldia jasoko du AEKk Barakaldoko BECen, apirilaren 5ean egun osoz ospatuko den jaialdian. Hori dela eta, AEKren esku egongo da aurtengo irekiera ekitaldia, eraikineko sarrera nagusian goizeko 10:30ean hasiko dena.
Bertan bildutako lagun guztiak Kittu elektrotxarangaren konpainian sartuko dira BECen, laugarren pabiloiraino. Txarteldegiaren parean egongo da jaialdia inauguratzeko moztu beharreko zinta, eta han egingo diete ongietorria AEKren Nazio Kontseiluko kide Lurdes Etxezarretak eta Barakaldoko AEKko zuzendari Argiñe Sangradorrek. Hitzalditxo labur baten ostean, Sangradorrek zinta moztu eta ofizialki hasiko da festibala.
AEKk bereziki eskertu du Zeidfest Gaztearen omenaldia, jaialdi hau “euskal musikaz, giro onean, eroso, aske eta euskaraz aritzeko gunea” delako. Hain zuzen ere, Euskal Herriko biztanle guztiak euskaraz eroso bizitzea da AEKren xedea, eta horretan dihardu egunero bere euskaltegietan, handik irtetean, ikasleak gure hizkuntza arlo guztietan erabiltzeko aukera izan dezaten: lagunartean, familian, lanean, aisialdian...
Hori dela eta, AEKk gonbita luzatu die “gure irakasle, ikasle, mintzalagun, berbalagun eta gainerako AEKideei eta euskaltzale guztiei, euskaraz eroso bizitzeko gune horretan elkarrekin disfruta dezaten”. Non eta Barakaldon, Euskal Herriko gune erdaldunetako batean: “Gogoan ditugu, batez ere, Barakaldon, Ezkerralde osoan eta, Ezkerraldean bezala, Euskal Herriko gunerik erdaldunenetan euskara ikasten ari diren ikasleak; zorionez, horien guztien ahaleginari esker, gero eta ohikoagoa delako euskaraz eroso bizitzeko guneez gozatzea”. Horregatik izango du Barakaldoko AEKko zuzendariak zinta mozteko ohorea.
Izan dadila BEC euskaldunon eta euskaltzaleen arnasgune datorren larunbatean!