Enpresekin batera izan dira aurkezpenean proiektua bultzatu duten erakundeetako ordezkariak. Eusko Jaurlaritzako Hizkuntza Politikako sailburuorde Miren Dobaran, Arabako Foru Aldundiko Berdintasun, Euskara eta Gobernantza diputatu Jone Berriozabal eta Gasteizko Udaleko Euskara zinegotzi Maria Nanclares. Eskuarak bat egiten du Eusko Jaurlaritzak bultzatuta abiatu zen Euskara eremu sozioekonomikoan sustatzeko 2020-2023 plana-rekin, eta Araban euskararen erabileran urrats berriak emateko helburua du. Euskara lan eremuan baliatzeko metodologia eta ekimen berriak sortuko dira proiektu honi esker.
Miren Dobaran Hizkuntza Politikako sailburuordeak proiektuaren garrantzia nabarmendu du: “Araban Lanabesen baitan sortu berri dugun Eskuara programak zehaztu egiten du gure lan eta lankidetza esparrua. Jarduera ekonomikoan eragiteko lur eremua zehaztu dugu, eta horrek lagunduko digu eraginkortasunean, Euskal Autonomia Erkidego mailan dugun planari zehatzago erantzuten eta epe labur zein urrunagorako helburuak jarri zein tresnak ezartzen”. Dobaranek gaineratu duenez “aurretik egindako bideak eraman gaitu honaino eta Eskuara enpresei zerbitzua emateaz harago, enpresa sare eta lankidetza komunitatea eratzeko aukera bat izango da, erakundeek babestua”.
Jone Berriozabalek proiektuaren izenari egin dio erreferentzia bere hitzaldian: “Gerardo López de Guereñuren Voces alavesas izeneko lanean, gaztelaniak euskaratik jasoak zituen hainbat eta hainbat hitz biltzen ziren, ohiko jardueran baliatzen ziren hitzak, eta
egun galzorian daudenak. Horien artean Eskuara, oraindik ere landa eremuan bakan batzuek aipatzen duten eskuarea. Ba, euskarazko harri-bitxi zaharrei erabilera berriak eman eta hementxe dakarkizuegu, gure eskuarea: Arabako enpresak euskaraz batu daitezen, eta guztion artean euskararen aldeko esperientziak bildu, jaso, eta jorratzeko. Arabako esparru sozioekonomikoko kide are gehiagorengana iristeko. Euskara xede, eskuara bide”.
Maria Nanclaresek Eskuara proiektuak Gasteizi eskainiko dion balioaz hitz egin du: “Eskuara proiektua aukera paregabea da Gasteizko 50 langile baino gehiagoko enpresentzat. Katalogo bat emango diegu, euskara sustatzeko hainbat zerbitzurekin, besteak beste: prestakuntza, itzulpen zerbitzua eta aholkularitza teknikoa. Arabako hiriburuko Udalarentzat ere abantaila da, hiriko ekoizpen sarearekin aliantzak sortzeko, eta industriarekin, zerbitzuekin eta merkataritzarekin lankidetza-bide berriak irekitzeko aukera ematen digulako”.
'Eskuara' ez da ezerezetik sortu. Proiektu berria den arren, Arabako enpresek euskararen erabilera bultzatzeko jarduna ez da berria, enpresa askok pausu garrantzitsuak egin baitituzte azken urteetan lan-munduan euskararen erabilera normalizatzeko. Eskuara, egiteko horretan laguntzera dator, bere esanahiak dioen moduan, konpromiso zehatz eta lorgarriak eskuratzeko, komunitatean metatzeko eta partekatzeko lanabesa izango da.
PARTE HARTZEAILEEN HELBURUAK
Gaur gaurkoz Eskuara zerbitzuarekin bat egin duten bi enpresek hitza hartu dute aurkezpen ekitaldian, eta aurrera begira egin asmo dutena zehaztu dute.
Aenkomerren kasua berezia da, merkatarien elkartea delako. Azaldu dutenez, hizkuntza kudeaketa egokia egiteak irabazi hirukoitza ekarriko die eurei: bezeroak, enpresak eta gizarteak irabaziko dutelako. Orain arte hizkuntza diagnostikoa osatu dute, eta beraz, diagnostikoan identifikatutako horiek hobetzeko lanketak zehatza egiten lagunduko die Eskuara zerbitzuko aholkulariek. Besteak beste, honakoak:
• Zerbitzuaren kalitatean eragiteko bazkide zein publikoari zuzendutako
dokumentazioa euskaratu.
• Langileen ezagutza sustatzeko aurrerapausoak eman.
• Langileen erabilera sustatzeko dinamikak martxan jarri.
• Hizkuntza paisaia estandarizatu, euskararen presentzia indartzeko.
• Euskararen erabilerak gure bazkideei eman ahal dien balioa proiektatu.
Sirimiriren kasuan, bestalde, pertsonen zahartze prozesuan laguntza eskaintzen dute, eta adinekoei, profesionalei eta senideei zuzendutako proiektuak sortu eta garatzen dituzte. 2018an euskara talde bat sortu zuten, eta hainbat aurrerapen egin zituzten: web orrialdea euskaratu, Euskaraldian parte hartu, enpresako langileei euskaraz moldatzeko tailerrak eskaini, Korrikan parte hartu... Hori guztia Lanabesi esker egin zutela azpimarratu dute.
Kanpoko aholkularitza teknikoari esker egin dute aurrera, azaldu dutenez, eta Eskuararekin bat eginik helburu berriak ezarri dituzte: enpresako plan estrategikoaren barnean euskararen garrantzia zehaztu; euskararen lan taldearen sustapena egin; eta orain arte egindako ekintzei eutsi. Zerbitzu berriarekin helburu horietara gerturatzeko urratsak ematen segitzea aurreikusten dute.